Hier mal meine Erzählung zu dem Tag, an dem der Showcase in Zürich stattgefunden hat. Der Text ist auf Schweizer Deutsch, doch sollte trotzdem so mehr oder weniger zu verstehen sein mit folgenden Hilfen:
xi= gewesen
xeh= sehen / gesehen
-------
Es isch 10 vor 6i am Morgä xi, wo min Wecker glüütet hett. Nöd so wie suscht amix, bini sofort hellwach xi, will hütt isch de Tag xi, woni nach über 1.5 Jahr Sunrise Avenue endlich mal wieder live in Concert xehn! Doch z’erscht hani no de Morgä müesse übrstah, vollgstopft mit Schuelstunde. Als wenn das nöd scho gnueg schlimm xi wär, nei, ich han au no ä Diskusionsleitig zämä mitere Schuelkollegin müesse füehre, ä ganzi Stund lang. De Afang isch guet gange, doch plötzlich, während ich vor de Klass gstande bin hani de Gedanke gha, dass de Samu jo eigntlich – rein theoretisch xeh – jede Moment i das Schuelzimmer chönt inelaufe, willr sich zu dem Ziitpunkt scho in Züri befunde hett… Natürlich ischs en völlig dumme Gedanke xi und nüt degliche isch passiert, ussert das mini Vorfreud nomeh gwachse isch.

Am 20 ab 11i hani endlich us gah. Ich bi mir öppis Zmittag go poschte, gschnell a de Seepromenade entlanggschlenderet und ha mich Schlussendlich mit de Desi am Paradeplatz troffe (wo gar nöd so eifach z’finde isch *lol*). Zämä simmr a de Bahnhofstrass zrugg zum HB gloffe, via Kauflüüte. Am HB hemmr d’Sandy troffe (durch dich weiss ich ez, wo de Interdiscount im Shopville isch ). Ab ez simmr also z’3te untrwex xi. Euse Plan hett wie folgt usxeh: Ä chli in Züri umelaufe & uf guet Glück de Samu treffe. Na ja, de Plan hemmr nöd realisiert, doch euse Plan B isch au nöd schlecht xi…

Nachdem mir die ganz Bahnhofstrass mitm Tram abgfahre hend, simmr zum Hotel vo de Jungs gange. Aso ich hett nie denkt, das mir dette öpprt treffet, will es isch jo so schöns Wettr xi und da ischs minere Meinig viil naheliegender, dass d’Jungs irgendwo am shoppe oder am Züri aluege sind. Doch ich ha mich girrt gha. No bevor mir bim Hotel xi sind, hend mir en Vollstopp grisse, d’Strassesiite gwechselt und nomal gnau gluegt. Dette, a 2 Tisch sind Sunrise Avenue xesse – oder zumindest en Teil devo. De Osmo, de Aki (wo mr für de Samu ghalte hend), de Sami, de Raul und de Rescht vo de Crew. Mir hend eus churzentschlosse is Cafi gegeüber xetzt und hend je öppis z’trinke bstellt (danke nomal für de Istee @ Desi!). Ich ha ä gueti Sicht uf de Osmo gha. Irgendwie hett er die ganz Ziit i eusi Richtig gluegt (und ich ha i sini Richtig gluegt) Nur scho dette hemmrs mega luschtig gha.
Öppe 30min spöter isch de Riku cho und hett sich au no an Tisch xetzt. Nach öppe 1nere Stund hend d’Jungs denn fertig gesse gha und sind richtig Hoteligang gloffe. Mir sind zu ihne gange. Erscht dette hemmr festgstellt, dass de Samu nöd de Samu sondern de Aki isch. De Osmo isch irgendwie plötzlich verschwunde xi. Defür hend sich de Sami und de Raul Ziit für eus gnoh. Mir hend chöne Fötelis mache, hend Autogramm übrcho und nochi gschnurrt bevor d’Jungs im Hotel verschwunde sind!
De Riku isch immrno am Esse xi miteme Crewmitglied. Ihn hemmr nöd welle störe, also hemmr nochi gwartet. I dere Ziit hani au de Silvie de Weg zum Hotel erchlärt gha und mal wiedr müesse feststelle, dass Züri eifach kompliziert isch, wemmr sich nöd uskennt!

Mir hend i de Ziit während mir gwartet hend beobachtet, wie de Raul, de Sami und es paar Crewmitglieder inen NRJ Van gstiige sind und devo gfahre sind. De Osmo isch nöd debi xi. Grad bevor d’Silvie au s’Hotel erreicht hett, isch de Riku ufgstande und richtig Hoteligang gloffe. Au er isch voll easy druff xi, hett Föteli und ä chli Smalltalk gmacht. Unter Anderem hett er eus gfrögt, ob mir au zu de Show chömet. Ich ha xeit, mir werdet i de 1. Reihe si. Er hett als Folg devo en riise Smile druffgha und gantwortet, mir söttet denn ä chli Stimmig mache. Und ich denke, das hemmr am Abig denn au gmacht…
D’Silvie hett eus churz druff au gfunde (oder umgekehrt). Mir hend beschlosse, langsam wieder richtig Innestadt z’gah. Mir hend en Stopp im Coop City gmacht und sind nachher zum Kauflütä gange. Dette sind scho 4 Fans xi. Mir hend zuegluegt, wies Bühne fertig ufbout hend und au xeh, dass de Sami und de Raul sich scho i de Halle befunde hend. So churz vor de 5e isch en Van acho, us dem de Samu (das Mal de richtig), de Riku und de Osmo usgstige sind. Ich ha s’Gfühl gha, dass niemrt öppis macht, daher bini zum Samu gange und ha ihm euse Survival Bag reloaded (dasmal mit Toblerone Schoggi) überreicht. Er hett drigluegt und sich glaubs gfreut gha. Hauptsach hettr xeit „Great, thx, high five“ und ich hanem High Five geh. Obwohli recht gross bin, hani mich recht müesse strecke!
Nachher ischr i de Halle verschwunde, gfolgt vom Riku; de Osmo hani scho wiedr vrpasst gha.
Während d’Jungs Soundcheck gha hend, bini gschnell in Coop gange. Plötzlich chum ich es sms vo de Sandy über „Chum Chum Simi da“ Ich ha so denkt, scheisse, meint sie ez de Samu oder de Sami und bin so schnells gange isch zruggxecklet. Tatsächlich isch de Sami zum Backstage Usgang usecho zum ä chli Fotis mache und Autogramm geh . Voll de zwäg Siech!

Wo er denn wiedr verschwunde xi isch, bini denn au definitiv agstande. S’hett 3 Türe gha, doch zum Glück hend mir usegfunde, welli 2 dases ufmachet und welli fürd VIP Lüütlis xi isch. So churz vorem 6i hett mir d’Nadine aglüte gha zum ihre de Weg zum Kauflüüte z’erchläre. Ich bin ihre entgege cho und so hett sies au gfunde gha.
Die letscht guet Stund isch relativ schnell verbi gange, hani s’Gfühl gha. S’isch viilicht au drah glege, das mers währendem astah so lustig gha hend. Am 5 vor 7ni isch Türöffnig xi. Es hett immernonig so viil Lüüt gha, vo dem her ischs recht „easy“ xi. Trotzdem bini so froh xi, woni mich schlussenldlich mit de Silvie und de Jessi i de 1. Reihe befunde han. S’geile isch abr au no xi, dasses gar kein Grabe gha hett zwüschet Publikum und Bühne, mir Fans sind direkt vor de Bühne gstande.
Die letscht Stund, bis am 8ti isch au relativ schnell verbi gange. Ufere Liinwand uf de Bühne sind verschiidni Sunrise Avenue Bilder duregflitzt & s’hett en Wettbewerb geh, womr hett chöne es Meet’n’Greet mit Sunrise Avenue günne, doch bi dem hani nöd gunne gha. Usserdem hani au Lüüt i de Halle xeh, wo erscht ez cho sind (-->Betty, Nadine & Tizi!). Bis am 10 ab 8ti isch nüt passiert und s’Gedränge isch voll nöd gross xi.

Churz nachher isch de Jonsch, de Moderator vo Radio NRJ Züri, ufd Bühne cho und hett Sunrise Avenue akündigt. Aso z’erscht hettr eus welle verarsche & xeit, dass anstatt Sunrise Avenue de Piero uftritt, doch das hend mir ihm natürlich nöd glaubt gha. Nach sindere Akündigung ischs Liecht usgange und übrd Liinwand isch en Trailer vo Sunrise Avenue cho. Mr hett s’Afang vom „The Whole Story“ Videoclip xeh, verschiideni Interviews mit de Jungs (u.a. wies uf POPGASM cho sind) und wiiteri Bilder.
Wo de Clip fertig xi isch, isch d’Liinwand ufe gange und d’Bühne isch dunkel xi. Miteme coole Liechteffekt begleitet sind d’Jungs denn ufd Bühne cho. De erscht woni xeh han, isch de Sami hinterem Schlagzüüg xi und denn de Samu. De 1. Song ish „My girl is mine“ xi, hammrgeil! Und was ich jo bsundrs cool gfunde han isch xi, dass de Samu währendem ganze Konzert wücki grad vor eus xi isch! Teilwiis ischr so nöch an Rand vo de Bühne cho, das mir hend müesse ufpasse, das er nöd uf eusi Händ gstande isch .
D’Stimmig isch scho vo Afang ah voll guet xi, de Riku hett also chöne stolz uf eus si!
S’dritte Lied isch „Forever Yours“ xi, zerscht en Keyboard Part only und nachher zämä mit de Drums. Isch au u huere schön xi!
Churz vor de Mitti vom Konzert hend d’Jungs „Monk Bay“ gspiilt gha. Das isch so was vo de geilschti Song wos git! Nei wücki, während dem Song, hani mich irgendwo anderscht befunde, doch nüm i de Publikum, er isch eifach sooo schön xi! „Sail Away with me“ und „Welcome to my life“ sind aschlüssend au zwei meeeega schöni Songs xi!
Dezwüschet hett de Riku mal es Guitaresolo gha. Dette isch de Samu nöd uf de Bühne xi. De Osmo hett sich hinterem Keyboard versteckt und is Publikum usegluegt. Wonr i mini Richtig gluegt hett, hani ihm gwunke, er hett zrugggwunke. Denn hani min Foti gnoh und adütet, dass ich vo ihm es Foti mache und er hett extra posiert. Haha, geile Siech!
Nachher sind 2 wiiteri Lieblingssongs vo mir gspiilt worde, “Bye Bye One Night Kind” und “Birds and Bees” “Bye Bye One Night Kind” isch sofern speziell cool xi, dass de Osmo hinterem Keyboard füre cho isch und beatboxt hett, während de Samu xunge hett! Isch eifach anderscht abgange!
“Birds and Bees” findi sowieso eine vo de geilschte Songs ever und de live isch eifach de Hammer! Die ganze vordere Reihe voll am abgah! S’isch eimalig xi! Nachm End vo dem Song, hani mir au am Samu sini atrunknig Wasserfläsche gschnappet wo grad vor mir uf de Bühne glege isch, han si selbr trunke und nachher mithei gnoh. Selber tschuld, wennr sis Züx grad vor mini Nase leiht!
En wiitere Song wo natürli nöd hett derfe fehle isch „Fairytale gone bad“ xi. De hett ez wücki die ganz Halle chöne mitsinge! Vor de Zuegabe hend d’Jungs no „Something Sweet“ gspiilt gha. Isch live au viil besser als uf de CD!
Wo de Samu denn wiedr füre cho isch, hettr ä Bierfläsche debi gha. Die hettr denn is Publikum geh, ich han au en Schluck devo gha . Als Zuegab hends „Dream like a child“ und „Nasty“ gspiilt. „Nasty“ isch mal wieder uuuu huere abgange!!! Doch leidr isch das au de 14. und somit letschti Song xi. Zum Schluss sind all Jungs ganz füre cho und hend sich bi eus Fans bedankt. De Sami hett no sini Drumstick is Publikum grührt, doch ich ha si nöd gfange. De Samu hett u.a. no sini 2 letschte Plektron weggeh, s’einte devo mir id Hand, nach dem er mich agluegt hett!

Als letschts Lied zum Usklang vom Konzert isch „6-0“ gloffe. Na ja, has zwar nöd so genial wie die andere Songs gfunde, doch s’hett no passt! D’Halle hett sich langsam gleert. Ich ha mich aschlüssend gschnell mit de Nadine, Betty und Tizi troffe, wo au ä wunderbari Sicht ufd Bühne gha hend und miteme Kolleg, wo au am Konzert xi isch. Sie sind abr nachm Konzert grad hei gange, ich nöd. Nachdem ich Radio Energy no es Interview zum Showcase geh han („ahhh, s’ish hammrgeil xi“) bini gmeinsam mit all dene Girls, wo au i de 1. Reihe xi sind, de Desi, de Sandy und de Dany simr zum Backstage Usgang gange. Dette hez no Recht viil Fans gha und niemrt hett gnau gwüsst, ob, wenn und wo ez d’Jungs no usechömet. Mir hend zuegluegt, wie die einzelne Bühneteil i diversi Auto verstaut worde sind. Ä Frau isch plötzlich usecho, wo au fürs Equipment zueständig xi isch und hett de Sandy zwei Drumsticks vom Sami id Hand druckt. De eint hett sie mir wiiter geh (Danke Sandy!) Churz druffabe isch die glich Frau mit 2 Orginal Setlists usecho, die eint han wiederum ich übrcho.

Irgendwenn isch denn Mal en Typ usecho miteme Whisky Cola wo irgendwie bi Bluewin schaffet und hett sich ä chli mit eus untrhalte & eus ä chli vo sim Drink geh (wirsch das eh nie lese, doch danke ) Er hett eus xeit, dass d’Jungs no i de Halle sind, doch wahrschiinli nöd durch de Usgang chömet. Mir sind als Folg denn zum Kauflütä Restaurant und tatsächlich sind dette Sunrise Avenue dinne amene Tisch ghocket – de Rescht vom Kauflütä Restaurant isch volle xi. Mir sind wiedr zruggfloffe gschnell und womr 2min spötr wiedr zum Restaurant cho sind, sind all Jungs verusse amene Tisch xesse und hend sich mit Fans untrhalte. Bim Samu hez am meischte Fans gha, daher bini zum Osmo gange. Ich han ihm d’Fläsche vom Samu geh zum unterschriibe. Er hett aber nöd gwüsst wie mr „Angie“ schriibt, aso han ichs ihm müesse buechstabiere. Nachher hettr no es Foti mit mir gmacht und ich bin so nöch nebet ihm gstande! Ich bin ab sofort Osmo Fan! Isch eifach en luschtige und coole Siech!! <3

Nach öppe 10min isch denn so eine vo de Crew usecho und hett xeit, dass s’Esse da seg. Es sind denn all Jungs wieder inegange, ussrt de Sami, er hett sich nöd chöne losrisse! Er hett wiiterhin Autogramm gschriibe und Fotis gmacht, so lang, bis de Samu mit de Suppe usecho isch und ihm en Löffel geh hett. Typisch Samu!!! Nachher isch au er inegange. Ich han ufd Uhr gluegt & ha leidr müesse feststelle, dasses scho nach de halbi 12e xi isch. Ich han mich denn agfange vo allne z’verabschiide und bi gmeinsam mit de Silvie zum HB zruggloffe, da ich, wie sie, uf de letschti Zug hei han müesse! Am 1 bini schliesslich dihei xi, mit immerno total viil Adrenalin im Körper undere mega guete Erinnerig a de ebe verganging Abig. De ganz Namittag/Abig isch öppis vom geilschte xi, won ich bis ez erlebt han! Thx to Sunrise Avenue for the perfect show & thx girls for making the day such a great experience!